ഡബ്ലിന്‍: കുടിയേറ്റ നയം പുനഃപരിശോധിക്കുമെന്ന പ്രഖ്യാപനത്തെ വിമര്‍ശിച്ച പ്രതിപക്ഷ പാര്‍ട്ടികളെ ശക്തമായി വിമര്‍ശിച്ച് ഉപപ്രധാനമന്ത്രി സൈമൺ ഹാരിസ് രംഗത്ത്. "ഇടതുകക്ഷികൾക്ക് പ്രശ്നം പരിഹരിക്കണമെന്നില്ല, കുടിയേറ്റത്തെക്കുറിച്ച് ഗൗരവമായ ചര്‍ച്ചകള്‍ തുടങ്ങുമ്പോഴെല്ലാം അവര്‍ അനാവശ്യ വിമര്‍ശനമുയര്‍ത്തി ചര്‍ച്ച അവസാനിപ്പിക്കുകയാണ് ചെയ്യുന്നത്," ഹാരിസ് ആരോപിച്ചു.
സിറ്റിവെസ്റ്റ് മേഖലയിലെ സംഘര്‍ഷത്തിന്റെ പശ്ചാത്തലത്തിലാണ് ഹാരിസ് കുടിയേറ്റ നയം പുനഃപരിശോധിക്കുമെന്ന് വ്യക്തമാക്കിയത്. അനധികൃത കുടിയേറ്റക്കാരെ നിയന്ത്രിക്കുന്നതോടൊപ്പം, സാധാരണ കുടിയേറ്റത്തിന്റെ വര്‍ദ്ധനയും സര്‍ക്കാര്‍ ശ്രദ്ധയില്‍ പെട്ടിട്ടുണ്ടെന്നും അദ്ദേഹം പറഞ്ഞു. “കുടിയേറ്റത്തിന്റെ ഗുണം ഞങ്ങള്‍ അംഗീകരിക്കുന്നു. എന്നാല്‍ നിയന്ത്രണം ആവശ്യമാണ്,” ഹാരിസ് വ്യക്തമാക്കി.
അതേസമയം, ജസ്റ്റിസ് വകുപ്പിന്റെ സെപ്റ്റംബര്‍ റിപ്പോര്‍ട്ട് പ്രകാരം, കഴിഞ്ഞ വര്‍ഷത്തേക്കാള്‍ അഭയാര്‍ത്ഥി അപേക്ഷകള്‍ ഗണ്യമായി കുറഞ്ഞതായാണ് കാണുന്നത്. ഇതാണ് പ്രതിപക്ഷം ചൂണ്ടിക്കാട്ടി സര്‍ക്കാരിനെതിരെ വിമര്‍ശനവുമായി രംഗത്ത് വന്നത്.
ലേബര്‍ പാര്‍ട്ടിയുടെ ആയോധാന്‍ ഒ’റിയര്‍ഡൈന്‍ എം.ഇ.പി. “നായകള്‍ അശ്രദ്ധമായി ഓരിയിടുന്നതുപോലെ” എന്ന വാക്കുകളിലൂടെ ഹാരിസിനെ വിമര്‍ശിച്ചു. സോഷ്യല്‍ ഡെമോക്രാറ്റ്‌സ് ടിഡിയും ജസ്റ്റിസ് വക്താവുമായ ഗാരി ഗാനോണ്‍ “ഹാരിസ് നൈജല്‍ ഫാരേജിന്റെ വഴിയിലേക്ക് പോകുകയാണ്” എന്ന് ആക്ഷേപിച്ചു.
ഇതിന് മറുപടിയായി ഹാരിസ് വ്യക്തമാക്കി: “കുടിയേറ്റത്തെക്കുറിച്ച് ചര്‍ച്ച ചെയ്യാതിരിക്കുന്നത് നിരുത്തരവാദപരമാണ്. അത് ജനങ്ങളോടും സമൂഹത്തോടുമുള്ള ദ്രോഹമാണ്. അയര്‍ലണ്ടിലും യൂറോപ്യന്‍ യൂണിയനിലും കുടിയേറ്റം നിയമപരമായും നയപരമായും ചര്‍ച്ച ചെയ്യേണ്ട വിഷയമാണ്.”
അയര്‍ലണ്ടില്‍ ലഭിക്കുന്ന അഭയാര്‍ത്ഥി അപേക്ഷകളില്‍ 80% നിരസിക്കപ്പെടുന്നുവെന്നത് തന്നെ ജനങ്ങളില്‍ കുടിയേറ്റം വളരെ കൂടുതലാണെന്ന ധാരണയ്ക്ക് കാരണമാകുന്നുവെന്നും അദ്ദേഹം ചൂണ്ടിക്കാട്ടി. “വസ്തുതകള്‍ അറിയുമ്പോള്‍ മിണ്ടാതിരിക്കാമായിരുന്നു. പക്ഷേ രാഷ്ട്രീയ നേതാവെന്ന നിലയില്‍ ജനങ്ങളുടെ ആശങ്കകള്‍ പ്രതിഫലിപ്പിക്കേണ്ടത് എന്റെ കടമയാണ്. അതാണ് ഞാൻ ചെയ്തതും,” ഹാരിസ് വ്യക്തമാക്കി.
Add comment
Comments